ଶ୍ରୀ ଵେଦ ଵ୍ୟାସ ସ୍ତୁତି - ଗୁରୁ ସ୍ତୋତ୍ର

ଵ୍ୟାସଂ ଵସିଷ୍ଠନପ୍ତାରଂ ଶକ୍ତେଃ ପୌତ୍ରମକଲ୍ମଷମ୍ ।
ପରାଶରାତ୍ମଜଂ ଵଂଦେ ଶୁକତାତଂ ତପୋନିଧିମ୍ ॥ 1

ଵ୍ୟାସାୟ ଵିଷ୍ଣୁରୂପାୟ ଵ୍ୟାସରୂପାୟ ଵିଷ୍ଣଵେ ।
ନମୋ ଵୈ ବ୍ରହ୍ମନିଧୟେ ଵାସିଷ୍ଠାୟ ନମୋ ନମଃ ॥ 2

କୃଷ୍ଣଦ୍ଵୈପାୟନଂ ଵ୍ୟାସଂ ସର୍ଵଲୋକହିତେ ରତମ୍ ।
ଵେଦାବ୍ଜଭାସ୍କରଂ ଵଂଦେ ଶମାଦିନିଲୟଂ ମୁନିମ୍ ॥ 3

ଵେଦଵ୍ୟାସଂ ସ୍ଵାତ୍ମରୂପଂ ସତ୍ୟସଂଧଂ ପରାୟଣମ୍ ।
ଶାଂତଂ ଜିତେଂଦ୍ରିୟକ୍ରୋଧଂ ସଶିଷ୍ୟଂ ପ୍ରଣମାମ୍ୟହମ୍ ॥ 4

ଅଚତୁର୍ଵଦନୋ ବ୍ରହ୍ମା ଦ୍ଵିବାହୁରପରୋ ହରିଃ ।
ଅଫାଲଲୋଚନଃ ଶଂଭୁଃ ଭଗଵାନ୍ ବାଦରାୟଣଃ ॥ 5

ଶଂକରଂ ଶଂକରାଚାର୍ୟଂ କେଶଵଂ ବାଦରାୟଣମ୍ ।
ସୂତ୍ରଭାଷ୍ୟକୃତୌ ଵଂଦେ ଭଗଵଂତୌ ପୁନଃ ପୁନଃ ॥ 6

ବ୍ରହ୍ମସୂତ୍ରକୃତେ ତସ୍ମୈ ଵେଦଵ୍ୟାସାୟ ଵେଧସେ ।
ଜ୍ଞାନଶକ୍ତ୍ୟଵତାରାୟ ନମୋ ଭଗଵତୋ ହରେଃ ॥ 7

ଵ୍ୟାସଃ ସମସ୍ତଧର୍ମାଣାଂ ଵକ୍ତା ମୁନିଵରେଡିତଃ ।
ଚିରଂଜୀଵୀ ଦୀର୍ଘମାୟୁର୍ଦଦାତୁ ଜଟିଲୋ ମମ ॥ 8

ପ୍ରଜ୍ଞାବଲେନ ତପସା ଚତୁର୍ଵେଦଵିଭାଜକଃ ।
କୃଷ୍ଣଦ୍ଵୈପାୟନୋ ୟଶ୍ଚ ତସ୍ମୈ ଶ୍ରୀଗୁରଵେ ନମଃ ॥ 9

ଜଟାଧରସ୍ତପୋନିଷ୍ଠଃ ଶୁଦ୍ଧୟୋଗୋ ଜିତେଂଦ୍ରିୟଃ ।
କୃଷ୍ଣାଜିନଧରଃ କୃଷ୍ଣସ୍ତସ୍ମୈ ଶ୍ରୀଗୁରଵେ ନମଃ ॥ 10

ଭାରତସ୍ୟ ଵିଧାତା ଚ ଦ୍ଵିତୀୟ ଇଵ ୟୋ ହରିଃ ।
ହରିଭକ୍ତିପରୋ ୟଶ୍ଚ ତସ୍ମୈ ଶ୍ରୀଗୁରଵେ ନମଃ ॥ 11

ଜୟତି ପରାଶରସୂନୁଃ ସତ୍ୟଵତୀ ହୃଦୟନଂଦନୋ ଵ୍ୟାସଃ ।
ୟସ୍ୟାସ୍ୟ କମଲଗଲିତଂ ଭାରତମମୃତଂ ଜଗତ୍ପିବତି ॥ 12

ଵେଦଵିଭାଗଵିଧାତ୍ରେ ଵିମଲାୟ ବ୍ରହ୍ମଣେ ନମୋ ଵିଶ୍ଵଦୃଶେ ।
ସକଲଧୃତିହେତୁସାଧନସୂତ୍ରସୃଜେ ସତ୍ୟଵତ୍ୟଭିଵ୍ୟକ୍ତି ମତେ ॥ 13

ଵେଦାଂତଵାକ୍ୟକୁସୁମାନି ସମାନି ଚାରୁ
ଜଗ୍ରଂଥ ସୂତ୍ରନିଚୟେନ ମନୋହରେଣ ।
ମୋକ୍ଷାର୍ଥିଲୋକହିତକାମନୟା ମୁନିର୍ୟଃ
ତଂ ବାଦରାୟଣମହଂ ପ୍ରଣମାମି ଭକ୍ତ୍ୟା ॥ 14

ଇତି ଶ୍ରୀ ଵେଦଵ୍ୟାସ ସ୍ତୁତିଃ ।