શ્રી વેદ વ્યાસ સ્તુતિ - ગુરુ સ્તોત્રો

વ્યાસં વસિષ્ઠનપ્તારં શક્તેઃ પૌત્રમકલ્મષમ્ ।
પરાશરાત્મજં વંદે શુકતાતં તપોનિધિમ્ ॥ 1

વ્યાસાય વિષ્ણુરૂપાય વ્યાસરૂપાય વિષ્ણવે ।
નમો વૈ બ્રહ્મનિધયે વાસિષ્ઠાય નમો નમઃ ॥ 2

કૃષ્ણદ્વૈપાયનં વ્યાસં સર્વલોકહિતે રતમ્ ।
વેદાબ્જભાસ્કરં વંદે શમાદિનિલયં મુનિમ્ ॥ 3

વેદવ્યાસં સ્વાત્મરૂપં સત્યસંધં પરાયણમ્ ।
શાંતં જિતેંદ્રિયક્રોધં સશિષ્યં પ્રણમામ્યહમ્ ॥ 4

અચતુર્વદનો બ્રહ્મા દ્વિબાહુરપરો હરિઃ ।
અફાલલોચનઃ શંભુઃ ભગવાન્ બાદરાયણઃ ॥ 5

શંકરં શંકરાચાર્યં કેશવં બાદરાયણમ્ ।
સૂત્રભાષ્યકૃતૌ વંદે ભગવંતૌ પુનઃ પુનઃ ॥ 6

બ્રહ્મસૂત્રકૃતે તસ્મૈ વેદવ્યાસાય વેધસે ।
જ્ઞાનશક્ત્યવતારાય નમો ભગવતો હરેઃ ॥ 7

વ્યાસઃ સમસ્તધર્માણાં વક્તા મુનિવરેડિતઃ ।
ચિરંજીવી દીર્ઘમાયુર્દદાતુ જટિલો મમ ॥ 8

પ્રજ્ઞાબલેન તપસા ચતુર્વેદવિભાજકઃ ।
કૃષ્ણદ્વૈપાયનો યશ્ચ તસ્મૈ શ્રીગુરવે નમઃ ॥ 9

જટાધરસ્તપોનિષ્ઠઃ શુદ્ધયોગો જિતેંદ્રિયઃ ।
કૃષ્ણાજિનધરઃ કૃષ્ણસ્તસ્મૈ શ્રીગુરવે નમઃ ॥ 10

ભારતસ્ય વિધાતા ચ દ્વિતીય ઇવ યો હરિઃ ।
હરિભક્તિપરો યશ્ચ તસ્મૈ શ્રીગુરવે નમઃ ॥ 11

જયતિ પરાશરસૂનુઃ સત્યવતી હૃદયનંદનો વ્યાસઃ ।
યસ્યાસ્ય કમલગલિતં ભારતમમૃતં જગત્પિબતિ ॥ 12

વેદવિભાગવિધાત્રે વિમલાય બ્રહ્મણે નમો વિશ્વદૃશે ।
સકલધૃતિહેતુસાધનસૂત્રસૃજે સત્યવત્યભિવ્યક્તિ મતે ॥ 13

વેદાંતવાક્યકુસુમાનિ સમાનિ ચારુ
જગ્રંથ સૂત્રનિચયેન મનોહરેણ ।
મોક્ષાર્થિલોકહિતકામનયા મુનિર્યઃ
તં બાદરાયણમહં પ્રણમામિ ભક્ત્યા ॥ 14

ઇતિ શ્રી વેદવ્યાસ સ્તુતિઃ ।